Hafa ber það sem sannara reynist

Hægt er að sýna fram á að hvert starf í álveri kostar mikla peninga ef gengið er út frá að störfin í álverinu sjálfu sé eini ávinningurinn.  En svo er aldeilis ekki.  Álverið borgar virkjunina og borgar fyrir rafmagnið í beinhörðum gjaldeyri. Aðstæður á markaði ráða hvort það gerist á 15,20 árum eða síðar. 

Ætla má að Steingrímur J. Sigfússon noti ekki hærri tölu en hann telur sig komast upp með, en hann hefur haldið því fram að aðeins 35% af veltu álvers verði eftir í landinu. Það þýðir að 35.000.000.000.-, þrjátíu og fimmþúsund milljónir, af hverjum 100 milljörðum verða eftir í landinu með einum eða öðrum hætti.

Álverið í Straumsvík borgaði t.d. Búrfellsvirkjun og höfnina Straumsvík.  Er Búrfellsvirkjun einskis virði?  Eða höfnin í Straumsvík? 

Að gefa í skyn að það kosti þjóðina fúlgu fjár í útgjöld að virkja og reisa álver og að fénu sé betur varið annarsstaðar er beinlínis rangt og óheiðarlegt komandi frá manni sem á að vita betur.

Allar hugmyndir, allt frumkvöðlastarf og sprotastörf eru góðra gjalda verð, en vandi okkar er meiri en svo að það komi í staðinn fyrir skynsamlega nýtingu orkuauðlinda landsins.

 

 

Dregur úr líkum á álveri

Athugasemdir

[Karma (IP-tala skráð) 3.11.2008 kl. 10:43]

Það er hægt að nýta orkuauðlindirnar á annan hátt en bara í álver.

Erum við ekki að doldið að leggja öll eggin í sömu körfu með því að treysta of mikið á álið?

[Tryggvi L. Skjaldarson, 3.11.2008 kl. 11:01]

Karma

 Álver koma helst til greina vegna þess að þau þurfa mikið rafmagn.

Við þurfum að eiga egg til að dreifa. 

[Gunnar Th. Gunnarsson, 3.11.2008 kl. 11:11]

Sammála Tryggvi.  Það væri óskandi að Björg Guðmundsdóttir myndi í samvinnu við Berg Sigurðsson, sem á þakkir Landsvirkjunar skyldar fyrir starfs sitt, finndu leiðir til þess að fullvinna ál. Norðmenn flytja inn ál, m.a. frá Straumsvík til þess að framleiða rándýra hágæðavöru s.s. álfelgur.

[Karma (IP-tala skráð) 3.11.2008 kl. 12:46]

En kemur ekkert annað til greina?

Í alvörunni, er enginn annar orkukaupandi í boði en álver?

[Tryggvi L. Skjaldarson, 3.11.2008 kl. 13:43]

Sæll Gunnar

Björk er án efa vel meinandi og það er gott mál að hún dragi fólk með sér í "brain storm" , en ég skil ekki alveg andúð hennar á álverum.  

Karma

Fyrir rúmu ári var Google með 450 þúsund leitarvélar í gangi.  Þær þurftu 20 megawött af rafmagni.  Það samsvarar orku  sem þarf í 32 af 480 rafgreiningar kerjum í Straumsvík. 

Gagnaver, sem margir nefna og halda að kalli á betur gefið fólk en þarf í álver, nota margfalt minna rafmagn en álver.

Auðvitað á að reyna að fá gagnaver til landsins líka því þannig verða til egg til að raðast í fleiri körfur. 

[Karma (IP-tala skráð) 3.11.2008 kl. 15:26]

Auðvitað er gott ef gagnaver koma hingað. Mér finnst það samt allt of mikil einföldun hjá mörgum (ekki þér) að stilla hlutunum upp gagnaver vs. álver. Eitt útilokar ekki endilega annað.

Gagnavershugmyndin kom eflaust upp þar sem þar er "hrein" notkun raforkunnar. Mér finnst að það mættu koma aðrar hugmyndir um mögulegan iðnað/framleiðslu. Það hefur lítið heyrst um fyrirhuguðu koltrefjaverksmiðjuna og hvort þau áform hafi breyst eitthvað á seinustu vikum.

Annars heyrði ég mjög áhugaverða hugmynd fyrir stuttu. Að Ísland legði í þróunarvinnu að nýta raforkuna í framleiðslu á vetni. Vetnið væri síðan flutt út með tankskipum eða lögð leiðsla til Evrópu. Þessi hugmynd byggist auðvitað á því að þróun vetnisvéla og vetnisvæðing haldi áfram.

Ég er sammála þér að eggin verði að vera mörg og í sem flestum körfum. Ég vil ekki sjá Íslenska hagkerfið of háð einum eða fáum greinum og hvað þá ef það eru bara 1-2 fyrirtæki með starfsemi í þessum greinum. Þá verður höggið meira þegar samdráttur verður í þeim greinum auk þess sem skipulagsbreytingar eins fyrirtækis gæti kostað landið þúsund störf. Það höfum við auðvitað séð í sambandi við fiskiðnaðinn hér á landi. Fjölbreytni mun skila okkur menntuðum störfum OG ófaglærðum störfum, við þurfum auðvitað alls konar störf.

Það væri best að reyna að fá breiðan hóp orkukaupenda t.d. gagnaver, margar minni verksmiðjur með mismunandi framleiðslu, auk stóru álveranna sem eru nú starfrækt eða í pípunum.